如果你想上「戰場」支持佔領人士，請花少少時間睇清楚局勢同你嘅敵人。參與佔領行動群眾，請有足夠嘅思想武裝先好上場上前排。
首先，佔領行動由始至終都係一場仗，而唔係單純佔領馬路，請參與佔領嘅群眾，一定要有足夠嘅思想武裝－－要企硬，絕不能婦人之仁，對敵人仁慈即係對自己殘忍，所以見到有反佔領人士暴力打人，唔好再諗和平萬歲，勇武上前夾實唔可以比佢走，盡可能幾人一組互相保護行動，反擊要一齊反擊，單獨行動好易比人打完連打嘅人嘅樣係點都望唔清。
弄清敵人及盟友。以目前形勢嚟講，支持佔領人士只有支持者本身、負責網戰同廣傳訊息嘅鍵盤戰士及網媒。支持佔領人士一定要團結一致，槍口要對外，男士走在前保護女士同學生，有人打埋黎夾實佢唔好比佢走，而記者係前排負責影低反佔人士暴力行為（TVB就收皮喇）。警察唔可能拉晒所有支持集會人士，有人被拉，反包圍警察，即場要求警察合理執法，有相有片，香港政府投訴無門，send比外國傳媒，要比輿論壓力比政府同警察承擔責任。
敵人分成好幾幫人，尤其出現警匪合作，呢種情況極壞－－原本警察係要保護市民，宜家黑社會滲入反佔中勢力，橫行無忌，裡應外合，佢地想有幾暴力得幾暴力都無問題，所以支持佔中人士一定係蝕底。因此我重申，如果到呢一刻你仍然覺得警察係有良知嘅，你已經唔適合企前排抗爭，請做後援，前排需要勇武抗爭、心態上能夠同警察抗衡嘅人。
論人數，雖然支持佔領人士居多，但論力量，警察同反佔領人士明顯更勝一籌，原因好簡單，除咗武裝，係因為佢地一早就視我地支持佔領人士為不可不打不殺嘅敵人，對方已經有呢種心態，支持佔領人士絕對唔能夠再咁軟弱，尤其唔可以再聽左膠同糾察講話撤退，否則一子錯滿盤皆落索，連日嘅堅守就會付諸東流。
有膽識嘅朋友，不妨考慮用反間嘅方法，綁條藍絲帶係身，混入去反佔領人群，然後不斷同人講：「老細叫散水，再打就無錢收。」烏合之眾，全部都係因為有人比錢先會出嚟搞事，既然係錢嘅問題就用錢去解決，以所謂「老細」名義誤導佢地自動撤離。如果有人問你係邊個，你答：「我係上面交帶落比錢，宜家係ｘｘ集合度等。」加多兩錢重誤導佢地散水。
我唔識點樣激勵士氣，但請大家想想連日來幾多萬位市民不辭勞苦，送各種物資去各個物資站，有幾多位司機大哥，義載佔領人士運送物資，幾多間小商店老闆，提供地方比大家休息同充電甚至提供伙食，仲有幾多位受影響嘅市民，雖然生活上真係受到大大小小嘅影響，亦可能未曾企出嚟支持，但心裡面其實默默咁支持各位嘅佔領行動。幾多張陌生而熟悉嘅面孔，一齊係街頭上面為咗同一個信念，為咗爭取真普選，為咗未來嘅香港而勇氣企出嚟，你我都係有良知嘅香港人，唔好就咁放棄，請堅守落去，誰是誰非，歷史自會定斷，請各位加油！
（P.S我知道有留意最新動態嘅大家，宜家心情一定係好憤怒，覺得警察完全無維護市民安全，反而警匪合作偏袒黑勢力。但既然已成事實，請將悲憤化成力量，今晚、明日、大後日，一樣出嚟支持佔領人士，多一個人，已經多一分力量。而我地係退無可退，一定要繼續向前。）
Search